كۇز باستالىپ، كۇن سۋىتا باستاعان  ەپيدەميولوگيالىق ماۋسىمدا باتىس قازاقستان وڭىرىندەگى 27531 تۇرعىن  جەدەل رەسپيراتورلى ۆيرۋستىق ينفەكسيامەن ناۋقاستانۋدا.

بۇل  100 مىڭ حالىققا شاققاندا 4334،7 قۇراپ وتىر. ال 14 جاسقا دەيىنگى اۋىرعان بالالار 69،4% قۇراۋدا.  قوعامدىق دەنساۋلىق ساقتاۋ دەپارتامەنتىنىڭ ينفەكسيالىق جانە پارازيتتىك اۋرۋلاردى ەپيدقاداعالاۋ ءبولىمىنىڭ باس مامانى س. ناسىروۆانىڭ ايتۋىنشا،  زەرتحانالىق ادىستەرمەن راستالعان تۇماۋدىڭ 61،7 % تۇماۋدىڭ ا ءتۇرى جانە 38،3% ۆ ءتۇرى تۇماۋعا قارسى ەكپە الماعان تۇرعىندار اراسىندا انىقتالعان.  ماماننىڭ مالىمەتىنشە، تۇماۋدىڭ الدىن الۋ شاراسى – ۆاكسيناسيا ەكەن.

الداعى 2017-2018 جىلدارداعى ەپيدكەزەڭگە جەرگىلىكتى بيۋدجەتتەن ءقاۋىپتى توپقا جانە ەپيدەميولوگيالىق كورسەتكىشتەر بويىنشا تۇماۋعا قارسى ەكپە جۇرگىزۋگە 52،2 ملن. تەڭگەنى قۇرايتىن 60 مىڭ دوزا ۆاكسينا الىنعان. تۇماۋعا قارسى اقىلى ەكپەنى «تالاپ» ااق، «مەديكەر» ج ش س، «ينتەرتيچ» جانە ورتالىق اۋداندىق اۋرۋحانالارىنىڭ ەكپە كابينەتتەرىندە جۇرگىزەدى. ۆاكسيناسيادان باسقا  تۇماۋدان قورعانۋدىڭ تاعى ءبىر ءتاسىلى ول – ارنامالى ەمەس پروفيلاكتيكا ەكەن. ارنامالى ەمەس پروفيلاكتيكا ورگانيزمنىڭ ءوزىنىڭ قورعانىش كۇشتەرىن نىعايتۋعا باعىتتالعان جانە ۆاكسيناسيالاۋمەن ءبىر ۋاقىتتا جۇرگىزۋگە بولادى. ارنامالى ەمەس پروفيلاكتيكا رەتىندە يممۋندىق تۇزەتۋشى پرەپاراتتار ياعني انافەرون، ينتەرفەرون، ۆيفەرون جانە وكسالين، انتيۆير  سەكىلدى  ۆيرۋسقا قارسى جاقپامايلار قولدانىلادى.

سالا مامانى حالىق كوپ جينالاتىن جەرلەردە، سونداي-اق ناۋقاسقا كۇتىم جاساعان كەزدە ناۋقاس ادام دا، دەنى ساۋ ادام دا بەتپەردە كيۋى قاجەتتىگىن ايتادى. رەسپيراتورلى ۆيرۋس پروفيلاكتيكاسىنىڭ ماڭىزدى ادىستەرىنىڭ ءبىرى اۋىرعان كەزدە نەمەسە ناۋقاسقا كۇتىم جاساعاندا قولدى سابىنمەن نەمەسە دەزينفەكسيالىق سۋلىقتاردى پايدالانىپ، ءجيى جۋۋ بولىپ تابىلادى.

جرۆي ءوزىنىڭ  اسقىنۋلارىمەن ءقاۋىپتى، سوندىقتان رەسپيراتورلىق اۋرۋلاردىڭ ءبىرىنشى بەلگىلەرى پايدا بولعان كەزدە ءوزىن-وزى ەمدەۋمەن اينالىسپاي، تەز ارادا دارىگەرگە بارعان ءجون.

گۇلىم اقاپ،

باتىس قازاقستان وبلىسى